توركجه يازماق اؤزگوونجيمي اونا بورجلو بيلديگيم ايبراهيم بي ساوالانا سونولور

"بيز"

سورارسينيزسا بيزي

گونشله دوغولدوق، دوغالي

آلينلاريميزدا دؤيوش دامغاسي

اوره ك لريميزده اؤيوت آغيرليغي

تبريز ايناميدا

اورمو گؤزه لليگينه آند ايچديك

و قدح لر قالديرديق

قالالار ساغليغينا

سؤي لر بيز ايله باشلاندي

چاخير باخيشلارا وورولدوغوموز آن

و اوزان لار ديلينه اوزلاشدي

اينسانليق گؤره ويميز

آلچالمايينجا اؤزگه هاوالارا

اعدام ديره ك لري ايله اوجالديق

و ياساق اولدو بوتون تاريخلره

اؤزگورلوك سئوداميز

آما دؤنمه ديك دمير بارماقليقلار آرديندا

يورقون دوشموش يوللار نامينا ...

اتك يازي:اؤنجه لر بو قوشوقو آيري بير مستعار آد ايله يايينلاميشديم.

سون ايكي يوز ايلده دونياني اؤز ائتگي سي آلتينا آلان دوشونسل مكتب لردن بيري ايسه ماركسيزم مكتبي دير. آدليم دوشونور كارل ماركسين يازيلاريندان اوره تيلن بو مكتب اينسانجيل ياشامدا ائتگي لي اولوب ان چوخ دوشونجه ايله اوغراشان چابالاري سؤز قونوسو توتوبدور. ماركسيزم دوشونجه سي نئچه بويوتلو بير مكتب اولاراق ائكونوميكال، اكينيمسل، بوگوشسل بويوتلاري ايچرمكده دير. آنجاق ماركسيزمين بوتون يوروملاريندا ائكونوميكال بويوت تمل آنلاييش نظرده توتولاراق توپلومسال ده ييشيم لر اؤزه لليكله اكينيمسل ده ييشيم لر ائكونومي اوزره يوروملاشديريلير. ماركسين ان آدليم اثري كاپيتال كيتابي دير. ماركس بو كيتابدا بورژوازي نين يئترسيزليك لرينه توخوناراق او گونكو دونيانين ائكونوميسينه ياپقي ياپان دورومدان الشديريده بولونوبدور. ماركس، يازيلاريندا اينسان ياشامي اؤزه لليكله پرولتاريا قاتي نين داها دا ياخشي بير ياشاما يييه لنمه سينه يانلي ايدي. ماركس دوشونجه سي نين كؤكلري سوسياليسم قاوراميندا گيزلي دير. اؤزه لليكله ماركس دوشونجه سي آدليم فيلوسوف هئگئلين دوشونجه سي اوزره تملله نيب دير.

باتي اؤلكه لري نين گليشيم سوره جينده دوغو اؤلكه لريندن داها آرتيق گليشميش بير ياشاما يييه لنمه لري دانيلماز بير گرچكليك دير. اسكي زامانلاردا دوغو دونياسي باتي دان ايره لي بير ياشام آلانيندا اولسايدي بئله سون يوز ايللرين ده ييشيم سورجلري سونوجوندا باتي دونياسي اينانيلماز بير گليشمه يي دئنه دي. بو گليشمه نده نين آراديغيميز زامان، يئنيجيلليك قاورامينا راستلاشيريق. بير چوخ دوشونوره گؤره اينسانجيل ياشامين بوتون آلانلاردا گليشمه سي يئنيجيلليگين يانسيماسي دير. يئنيجيلليك، آنايوردو اولان باتي دا اينسان ياشاميني آلت – اوست ائده رك داهادا قولايلاشديردي. يئنيجيلليك سونوجوندا يارانان ياشام، آرتيق اوسسال دوشونمه يه اوستونلوك وئريب توپلومو اويقارليغا دوغرو اوغراتدي. يانيقلي گله نك لر بير قيراغا قويولوب اينسان اوغلو يئني يؤنتم لر دئنه دي. گله جك ده بوتون دونياني ائتگي له ين بو يئنيجيلليك اروپانين بير نئچه اؤلكه سيندن باش قالديرسايدي سا آرتيق توم دونيايا يايقينلاشدي. يئنيجيلليگه بير باشلانقيج تاريخي بليرتديگيميزده 18- ينجي يوز ايلدن بري اوز وئرن ده ييشيم لري سؤيله يه بيله ريك.

توركچولوك دوشونجه سي نين كؤكلرين آراديغيميز زامان 18-ينجي يوز ايلين سونلاريندان بري تورك دونياسيندا اوز وئرن اولايلارا راستلاشيريق. آنجاق بو گون توركييه جمهورييتينده توركچولوك آدي ايله چابا گؤسترن بير سيرا بيرئي لر ايله هؤرگوتلرين وار اولماسينا تانيغيق. گرچك دن كلاسيك توركچولويه باخديغيميزدا بو گونكو توركچولوك سؤيلمي ايله نه قدر ياخينليق حيس ائده بيله رك؟ بو گون، توركچولوك آدين داشييان اولكوجولر كلاسيك توركچولرين نه قدر آردلارين توتان بيرئيلرديلر؟ كلاسيك توركچولوك دئديگيميزده 19-ينجي يوز ايلين سونلاري ايله 20-ينجي يوز ايلين ايلك لرينده مئيدانا گلن قاسپيرالي، آغااوغلو، آقچورا، گؤك آلپ، رسولزاده و علي بي حسين زاده كيمي اينسانلار سؤز قونوسودور. بو گون، توركچولوك نه قدر بو اينسانلارين ياراتديقلاري سيياسي سنت ايله دوشونجه ايلكه لرين نظرده آلاراق آدديملايير؟ يازارين فيكريجه بو گونكو توركچولوك او قدر بو بؤيوك دوشونورلرين دوشونجه لريندن چاشيب ديركي توركچولوك آدي آدلانديرديغيميز بئله يانليش اولور.

سون زامانلاردا اولوسلاشما اوزره ياپيلان آراشديرمالار اولدوقجا گئنيش قاپساملي دير. بير چوخ دوشونوره گؤره، اولوسلاشما؛ اينسانجيل توپلومونون ائوريمينده بير آشاما كيمي تانيملانير. اولوسلاشما قوراملاري اينسانلار آراسي بير باغين اوره تيلمه سيندن بحث ائتمك ده ديرلر. اسكي لرده دين كيمي اولقولار بو باغين وار اولماسينا ندن اولسايديلار، بوگونكو سئكولار دونيادا يئره ل دينلر اؤزه لليكله اولوسچولوق اينسانلار آراسي بير چئشيت باغلانتي لاري تامين ائتمك ده دير. اولوسچولوق قوراملاري نين بير چوخو اولوسلاشما سوره جي ايله يئنيجيلليگي پارالئل بير شكيلده قوراملاشديريرلار. يعني بير چوخ دوشونور ساريندان اولوسچولوق يئنيجيلليگين بير اورونو اولاراق ده يرلنديريلير. بو اوزدن يئنيجيل اولوسچولوغا باشلانقيج تاريخي تعيين ائتمك اولار. آنتوني گيدنزه گؤره، اولوسچولوغون باشلانقيج تاريخي 17-ينجي يوز ايلدير. پتر واگنر ايسه:" دئموكراتيك و تئخنيكال دئوريملر چاغيندا، يعني 18-ينجي يوز ايل دؤنومونده، هر باخيمدان اولماسادا بعضي باخيملاردان اولوسچولوق و مدرنليگين بير باشلانقيجي اولاراق قبول ائديله بيلر."(1)

اينسان اوغلونون بوگونكو ياشامي تاريخ بويو چئشيدلي ائوره لردن كئچيب دير. دائما ايره لي له مه يي آماج توتان بو تاريخه باخديغيميزدا بير گليشمه سئيرينده اولدوغوموز آپ – آيدين گؤز اؤنونده دير. اينسان ذاتينا ياخشي بير گؤروشله باخارساق سا اينساني ياخشي ليق و باريشي سئون بير وارليق كيمي تصور ائتمك ممكن دور. باريشجيليق گرچك دونيادا گرچكلشه بيلمه سه بئله بوتون دوشونسل چابالارين سونوج توتدوغو اورتاق نقطه دير. توپلوملاري يؤنتمك يؤنلرينه باخديغيميزدا دوشونسل چابالار بوگون اولوس – دؤولت و آرخاسيندا اولان اولوسچولوغا سونوجلانيب دير. يعني دوشونسل چابالارين گليشيمي توپلوملارين گليشمه سئيرينده اينسان اوغلونا توپلومو داهادا باريشجيل بير آلانا يؤنتمك اوچون اولوس- دؤولت آنلاييشيني اؤنرمك ده دير. اؤزه لليكله باتي اؤلكه لري بو ائوره لري دوغرو – دوزگون سوييه ده كئچه رك دوغو اؤلكه لريندن داها آرتيق باريشجيل بير اورتامدا ياشاماقداديرلار. يعني توپلوملاري يؤنتمك و بيرئيلرين داها دا باريشجيل بير اورتامدا ياشاماسي اوچون گرچك بير قاورام وارساسا اودا اولوسچولوق قاورامي دير.

مدرنيزمين گليشمه سي ايله يئني آنلاييش لار دوغولوب سيياسال دوشونجه ده بؤيوك ده ييشيم لر اوز وئرمك ده دير. دئموكراسي قاورامي ايله ياناشي مدرنيزاسيون سونوجوندا ده ييشيلن قاوراملاردان بيري ايسه سيويل توپلوم قاورامي دير. سيويل توپلوم قاورامي گونوموزون توپلومسال اولايلاريندا ان چوخ قوللانيلان بير قاورام حالينا گليب دير. سيويل توپلوم قاورامي نين بو قدر قوللانيلماسي بو قاورامين اينسانلاردا چاغريشديرديغي و چاغداش اؤزه لليك لردن قايناقلانماق آنلاميندادير. بو گونكو آنلامدا سيويل توپلومون اولوشماسي مدرنيته نين گليشمه سي ايله عيني دوغرولتودادير. سيويل توپلوم قاورامي نين اورتايا چيخيشي و تاريخسل دؤنملرده فرقي تانيم لار تانيغي اولدوغو اوزره مدرنيته ايله بيرليكده دوشونولن بير قاورام اولماق فيكرينده ييك.

رضاخان حاكيميته گلديگيندن بري ايراندا يارانان مركزي دؤولتچيليك، سيياسال ياپيلانما و كولتور گونئي آذربايجاني دا ائتگي لمكده دير. كئچميشدن ميراث قالان گئلنكسل كولتور دئموكراسي نين تمل ده يرلري نين گونئي آذربايجاندا يئرللشمه سيني انگلله ييب دير. رضاخانين ايش اوسته گلمه سي ايله بيرليكده پان فارسيزم هئموژئنليگينين ياراتيلماسي گونئي آذربايجانين اولوسلاشما سوره جينه گيره بيلمه مه سينه نده ن اولموشدور. بو چاليشما گونئي آذربايجان توپلومونون دئموكراتيك لشمه سوره جينده 21 آذر حركاتي نين نئجه اؤنملي اولدوغونو سؤز قونوسو توتاراق اينجه له مك آماجيندادير.